ព្រហស្បតិ៍ , 11 សីហា 2022

អុញនោះ! FIFA កំពុងពិភាក្សាផ្លាស់ប្តូរកាលបរិច្ឆេទចាប់ផ្តើមការប្រកួត World Cup នៅប្រទេសកាតា

(បាល់ទាត់)៖ ការប្រកួតបាល់ទាត់ពិភពលោក World Cup 2022 អាចចាប់ផ្តើមមួយថ្ងៃលឿនជាងការគ្រោងទុក  បន្ទាប់ពីសំណើត្រូវបានដាក់ទៅកាន់ FIFA ដែលស្នើសុំឱ្យម្ចាស់ផ្ទះកាតា ចាប់ផ្តើមការប្រកួតវគ្គមុនគេ។

មែនទែនទៅ ការប្រកួតគ្រោងនឹងចាប់ផ្តើមនៅថ្ងៃចន្ទ ទី២១ ខែវិច្ឆិកា ជាមួយនឹងការប្រកួតក្នុងពូល A រវាងក្រុមហូឡង់ និងសេណេហ្គាល់។ កាតា ស្ថិតក្នុងពូលដូចគ្នា ប៉ុន្តែគ្រោងនឹងចូលរួមក្នុងការប្រកួតទីបី ដោយត្រូវប៉ះអេក្វាឌ័រ បន្ទាប់ពីអង់គ្លេស ចាប់ផ្តើមយុទ្ធនាការរបស់ពួកគេជាមួយគូប្រជែងក្នុងពូលB ។

ជាការពិត វាជាទម្លាប់សម្រាប់ម្ចាស់ផ្ទះ ក្នុងការបើកការប្រកួត ហើយឥឡូវនេះគេយល់ថា FIFA កំពុងពិចារណាលើសំណើរ ដើម្បីផ្លាស់ប្តូរកាលបរិច្ឆេទចាប់ផ្តើមទៅថ្ងៃអាទិត្យទី 20 ខែវិច្ឆិកា។ នោះនឹងអនុញ្ញាតឱ្យ កាតា ជាមួយ អេក្វាឌ័រ ប្រព្រឹត្តទៅនៅម៉ោង 19៖00 ម៉ោងក្នុងស្រុក ជាមួយនឹងការប្រកួតតែមួយគត់ ដែលត្រូវលេងនៅថ្ងៃអាទិត្យ។

សំណើដែលអនុវត្តតាមកិច្ចព្រមព្រៀងរបស់ក្រុមទាំងពីរ ក៏ដូចជា CONMEBOL ឥឡូវនេះ គឺបានទៅដល់ដៃក្រុមប្រឹក្សា FIFA ហើយ ដែលរួមមានប្រធានសហព័ន្ធទាំងប្រាំមួយ។ នៅក្នុងលិខិតមួយផ្ញើទៅកាន់សមាជិកនៃការិយាល័យ ដូចដែលបានរាយការណ៍ ដោយកាសែត New York Times នោះ FIFA បាននិយាយថា "វាជាប្រពៃណីដ៏យូរអង្វែងមួយ ក្នុងការប្រារព្ធពិធីចាប់ផ្តើម FIFA World Cup ជាមួយនឹងពិធីបើកការប្រកួតដំបូង ដែលមានទាំងម្ចាស់ផ្ទះ ឬក្រុមការពារជើងឯក។

ជុំវិញបញ្ហានេះ រដ្ឋបាលរបស់ FIFA បានវាយតម្លៃពីផលប៉ះពាល់ផ្នែកពាណិជ្ជកម្ម និងផ្លូវច្បាប់នៃសំណើនេះ រួមទាំងផលប៉ះពាល់លើការសន្យាតាមកិច្ចសន្យាលើសិទ្ធិប្រព័ន្ធផ្សព្វផ្សាយ ការឧបត្ថម្ភ និងសំបុត្រ ក៏ដូចជាបដិសណ្ឋារកិច្ច រួមជាមួយផលប៉ះពាល់លើអ្នកគាំទ្រធ្វើដំណើរផងដែរ៕