×

Eto’o ព្យាករណ៍ថាកាមេរូន នឹងលើកពាន World Cup ក្រោយឈ្នះម៉ារ៉ុក ក្នុងវគ្គផ្ដាច់ព្រ័ត្រ

Samuel Eto’o ​ប្រធានសហព័ន្ធកីឡបាល់បាល់ទាត់កាមេរូន (FECAFOOT) បានព្យាករណ៍ថាកាមេរូន នឹងក្លាយជាម្ចាស់ជើងឯក FIFA World Cup 2022 នៅប្រទេសកាតា ដោយយកឈ្នះ ម៉ារ៉ុក ក្នុងវគ្គផ្ដាច់ព្រ័ត្រ។

លោក Eto’o បាន​ថ្លែងដូច្នេះថា៖«អាហ្រ្វិក​តែងតែ​មាន​សក្តានុពល​ក្នុង​ការ​ប្រកួត​បាល់ទាត់​ពិភព​លោក ប៉ុន្តែ​យើង​​តែងតែ​បង្ហាញ​មុខ​មិន​សូវ​បាន​ល្អ​ឡើយ។ ក្នុង​អំឡុង​ពេល​ប៉ុន្មាន​ឆ្នាំ​មក​នេះ ក្រុម​មក​ពី​អាហ្រ្វិក​ទទួល​បាន​បទ​ពិសោធន៍​កាន់តែ​ច្រើន​ឡើង ហើយ​ខ្ញុំ​គិត​ថា​ពួកគេ​ត្រៀម​ខ្លួន មិន​ត្រឹមតែ​ចូលរួម​ក្នុង​ការ​ប្រកួត​បាល់ទាត់​ពិភពលោក​ប៉ុណ្ណោះ​ទេ ប៉ុន្តែ​ថែម​ទាំង​ដើម្បី​ឈ្នះ​វា​ផង​ដែរ។ កាមេរូន នឹង​ឈ្នះ​ការ​ប្រកួត​វគ្គផ្តាច់​ព្រ័ត្រ World Cup»។

អតីតខ្សែប្រយុទ្ធរបស់ក្រុមជម្រើសជាតិកាមេរូនរូបនេះបានជាប់ឆ្នោតធ្វើជា​ប្រធានសហព័ន្ធកីឡបាល់បាល់ទាត់កាមេរូន កាលពីថ្ងៃសៅរ៍ ទី១១ ខែធ្នូ ឆ្នាំ២០២១ ដោយ​ទទួល​បាន​ការគាំទ្រ​៤៣​សំឡេងពីសមាជិក។

កាលនៅជាកីឡាករ Eto’o ធ្លាប់លេងឲ្យ​ក្លិបធំៗជាច្រើននៅតំបន់អឺរ៉ុបដូចជា៖
– ១៩៩៧-២០០០ Real Madrid
– ២០០៤-២០០៩ Barcelona
– ២០០៩-២០១១ Inter Milan
– ២០១៣-១៤ Chelsea
– ២០១៤-១៥ Everton
– ២០១៨-១៩ Qatar SC និងក្លិបជាច្រើនផ្សេងទៀត ខណ:ក្នុងក្រុមជម្រើសជាតិកាមេរូន រូបគេធ្លាប់បង្ហាញខ្លួនសរុប១១៨លើក ស៊ុតបញ្ចូលទី៥៦គ្រាប់ ជួយឲ្យកាមេរូនឈ្នះពាន African Cup ២ដងនៅឆ្នាំ ២០០០ និង ២០០៦។

ក្រុមជម្រើសជាតិកាមេរូន ស្ថិតនៅពូល G ជាមួយជើងខ្លាំង ប្រេស៊ីល, ស្វីស​ និង ស៊ែប៊ី ដោយឡែកក្រុមជម្រើសជាតិម៉ារ៉ុក ស្ថិតនៅពូល F ជាមួយ បែលហ្សិក, ក្រូអាត និង កាណាដា ខណ:ពានរង្វាន់ពិភពលោក FIFA World Cup 2022 នឹងចាប់ផ្តើមឡើង នៅថ្ងៃទី២០ វិច្ឆិកា ដល់ថ្ងៃទី១៨ ខែធ្នូ ចុងឆ្នាំនេះ។

ក្រុមជម្រើសជាតិកាមេរូន ក្រោមការដឹកនាំរបស់លោក Rigobert Song នឹងត្រូវជួបបើកឆាកជាមួយ ស្វីស នៅកីឡដ្ឋាន Al Janoub វេលាម៉ោង ៥:០០ល្ងាច ម៉ោងនៅកម្ពុជា៕

សូមបញ្ចេញមតិនៅទីនេះ




សូមគោរពទៅតាម គោលការណ៍មួយនេះ


អត្ថបទទាក់ទង

ទីបំផុត! បែកធ្លាយមូលហេតុ Ronaldo ចែកផ្លូវជាមួយភ្នាក់ងារលោក Jorge Mendes

កាលពីដើមខែមករា Cristiano Ronaldo និងភ្នាក់ងារគឺលោក Jorge Mendes បានសម្រេចចែកផ្លូវគ្នា ដោយសារការមិនចុះសម្រុងគ្នាលើទិសដៅថ្មីរបស់ CR7 ខណៈមូលហេតុនៃការចែកផ្លូវនោះ មិនបានទម្លាយឲ្យដឹងច្បាស់នោះទេ។ ក៏ប៉ុន្តែពេលនេះអ្វីៗកាន់តែច្បាស់នៅពេលដែលកាសែត El Mundo បានសរសេរថា កីឡាករវ័យ ៣៧ឆ្នាំ Ronaldo បានផ្ញើ "ឱសានវាទ" ទៅ លោក Mendes ជាមួយនឹងខ្លឹមសារថា "ផ្តល់ឲ្យខ្ញុំទៅ Chelsea ឬ Bayern ឬយើងឈប់នៅទីនេះ!"។ ដូច្នេះមានន័យថា ការចែកផ្លូវរបស់ពួកគេទាំងពីរ គឺដោយសារមូលហេតុនេះ។ ជាការពិតណាស់ ថ្វីដ្បិតតែមានទេពកោសល្យ និងកេរ្តិ៍ឈ្មោះក៏ដោយ ក៏ភ្នាក់ងារដ៏ល្បីមួយនេះ មិនអាចធ្វើឲ្យ Ronaldo ពេញចិត្តឡើយ។ លោក Mendes ជឿជាក់ថា មានតែ Al-Nassr ទេ ដែលអាចបំពេញតម្រូវការប្រាក់ខែរបស់ Ronaldo ខណៈដែលខ្សែប្រយុទ្ធវ័យ 37 ឆ្នាំខ្លួនឯង នៅតែមានទំនុកចិត្តថា ខ្លួននៅតែទាក់ទាញក្លឹបធំៗជាច្រើននៅអឺរ៉ុប។ គួររម្លឹកថា លោក Mendes គឺជាភ្នាក់ងាររបស់ Ronaldo តាំងពីចាកពីចេញ Sporting Lisbon ទៅចូលរួមជាមួយ Man United ក្នុងឆ្នាំ ២០០៣ ដោយបានរួមចំណែក យ៉ាងច្រើនដល់ការចរចាកិច្ចសន្យារបស់ CR7៕
ពុធ , 25 មករា 2023 16 អ្នកទស្សនា 4 ថ្ងៃកន្លងទៅ

មនុស្ស៨នាក់ត្រូវចាប់ខ្លួន បន្ទាប់ពីអបអរជ័យជម្នះរបស់ Arsenal លើ Man United ៣-២ ដោយគ្មានការអនុញ្ញាត

យោងតាម BBC បានចុះផ្សាយថា មានអ្នកគាំទ្រក្រុមកាំភ្លើងធំ Arsenal ៨នាក់ ត្រូវបានចាប់ខ្លួននៅទីក្រុង Jinja នៃប្រទេសអ៊ូហ្គង់ដា បន្ទាប់ពីអបអរជ័យជម្នះ ៣-២ របស់ក្លិបលើក្រុម Manchester United ក្នុងក្របខ័ណ្ឌ English Premier League កាលពីថ្ងៃទី២៣ ខែមករា ឆ្នាំ២០២៣។ អ្នកគាំទ្រមួយក្រុម បានពាក់អាវ Arsenal ហើយកាន់ពានជានិមិត្តរូប ខណៈប៉ូលិសបាននិយាយថា ពួកគេមិនមានការអនុញ្ញាតឲ្យធ្វើពិធីដង្ហែ ដែលជាបទល្មើសសណ្ដាប់ធ្នាប់សាធារណៈ។ អ្នកគាំទ្រក្រុមកាំភ្លើងធំ បានធ្វើដំណើរតាមក្បួនរថយន្តចំនួន ៥ គ្រឿង កាលពីព្រឹកថ្ងៃច័ន្ទ នៅពេលដែលពួកគេត្រូវបានរារាំង ដោយប៉ូលិស។ ម្នាក់ក្នុងចំណោមពួកគេ បានកាន់ពានដែលពួកគេបានទិញនៅហាងក្នុងស្រុកមួយ។ អ្នកគាំទ្រម្នាក់ទៀត ឈ្មោះ Baker Kasule ត្រូវបានដកស្រង់សម្ដីដោយគេហទំព័រព័ត៌មាន Daily Monitor ក្នុងស្រុកថា៖« ខ្ញុំមិនដឹងថា យើងបានធ្វើអ្វីខុសនោះទេ ប៉ុន្តែយើងគ្រាន់តែអបអរជ័យជម្នះរបស់យើងលើគូប្រជែង Manchester United»។ ជ័យជំនះលើក្រុមបិសាចក្រហម បានផ្ដល់ឲ្យក្រុមកាំភ្លើងធំ មាន៥០ពិន្ទុ ឈរកំពូលតារាង ដោយផ្ដល់ក្ដីសង្ឃឹមដល់អ្នកគាំទ្រជុំវិញពិភពលោក ថា ក្លិបអាចបញ្ចប់ការរង់ចាំរយៈពេល ១៩ឆ្នាំ របស់ខ្លួន ដើម្បីឈ្នះពានរង្វាន់ក្របខ័ណ្ឌ English Premier League៕
ពុធ , 25 មករា 2023 8 អ្នកទស្សនា 5 ថ្ងៃកន្លងទៅ

សមាជិកលីគកំពូលម៉ាឡេស៊ី ត្រៀមប្រកួតមិត្តភាពទល់នឹង ណាហ្គាវើលដ៍ និងភ្នំពេញក្រោន

យោងតាមបញ្ជាក់របស់គេហទំព័រ Smart RSN Stadium នៅព្រឹកថ្ងៃទី២៥ ខែមករា នេះបានឲ្យដឹងថា ក្លិបបាល់ទាត់ភ្នំពេញក្រោន នឹងប្រកួតមិត្តភាពអន្តរជាតិជាមួយ Kuching City FC សមាជិកលីគកំពូលម៉ាឡេស៊ី នៅថ្ងៃទី៤ ខែកុម្ភៈ ឆ្នាំ២០២៣ (Close door match – ប្រកួតបិទទ្វារ) ក្នុងកីឡដ្ឋាន Smart RSN។ ខណ:ក្លិបបាល់ទាត់ណាហ្គាវើលដ៍ ក៏ត្រៀមប្រកួតមិត្តភាពអន្តរជាតិផ្លាស់ប្តូរបច្ចេកទេស ជាមួយក្លិបបាល់ទាត់ Kuching City FC របស់ប្រទេសម៉ាឡេស៊ី ដូចគ្នា នៅកីឡដ្ឋានខេត្តកំពង់ស្ពឺ នាថ្ងៃទី២ ខែកុម្ភ: ឆ្នាំ២០២៣ វេលាម៉ោង ៦:៣០នាទីយប់។ គួរដឹងថា កាលពីថ្ងៃទី២៤ ខែមករា ឆ្នាំ២០២៣ ម្សិលមិញនេះ ក្លិបបាល់ទាត់ភ្នំពេញក្រោន បានប្រកួតស្មើ ១-១ ទល់នឹង ISI ដង្កោសែនជ័យ នៅកីឡដ្ឋាន Smart RSN ក្នុងជំនួបមិត្តភាព៕
ពុធ , 25 មករា 2023 8 អ្នកទស្សនា 5 ថ្ងៃកន្លងទៅ

Casemiro នឹងអវត្តមាន ពេល បិសាចក្រហម ប៉ះ កាំភ្លើងធំ នៅចុងសប្ដាហ៍នេះ

ខ្សែ​បម្រើ​របស់ បិសាចក្រហម Manchester United កីឡាករ Casemiro នឹង​​ត្រូវ​ជាប់​បម្រាម​​សម្រាប់​ការ​ប្រកួត​ថ្ងៃ​អាទិត្យ ​ទល់​នឹង​ក្រុម​នាំ​មុខ​កំពូល​តារាងកាំភ្លើងធំ Arsenal ។​ ការ​ប្រកួត​កាល​ពី​យប់​មិញ United បាន​ប្រកួត​ស្មើ​​គ្នា ​ជាមួយ Crystal Palace ១-១។ គ្រាប់​បាល់​របស់​បិសាច​ក្រហម ​ធ្វើ​បាន​ដោយ​ខ្សែបម្រើ Bruno Fernandes ខណៈ Michaek Olise ជា​អ្នក​រក​គ្រាប់​ឲ្យ Palace ពីការស៊ុត Free Kick យ៉ាងអស្ចារ្យ។ យ៉ាងណាមិញ ប្រកួត​នេះ ខ្សែ​បម្រើ Casemiro ទទួល​បាន​កាត​​លឿង​ ដែល​ជា​កាត​ទី​៥​របស់​គេ ​ក្នុង​រដូវ​កាល​នេះ​ ដូច្នេះ​ត្រូវ​ជាប់​បម្រាប​មួយ​ប្រកួត​ សម្រាប់​ប្រកួត​បន្ទាប់។ នេះ​មាន​ន័យ​ថា Casemiro នឹង​មិន​មាន​វត្តមាន ពេល United ប៉ះ Arsenal នៅ​ថ្ងៃ​អាទិត្យ​សប្ដាហ៍​នេះ។ បែប​នេះ​ក្ដី អ្នក​ចាត់​ការ​របស់ Man Utd លោក Ten Hag បាន​លើក​ឡើង​ថា៖ "លើក​ចុង​ក្រោយ​​ពួក​យើង​ឈ្នះ​ពួក​គេ (Arsenal) ដោយ​គ្មាន Casemiro។ ពេល​នេះ ពួក​យើង​​ត្រូវ​តែ​ធ្វើ​ដូច​គ្នា"។ Arsenal បច្ចុប្បន្ន​​​គម្លាត​៨​ពិន្ទុ​ ឈរ​លើ​កំពូល​តារាង ​​ចាញ់​តែ​ម្ដង​គត់​នៅ Premier League ក្រោយ​ថ្វី​ជើង United ៣-១ កាល​ពី​ខែ​កញ្ញា។ សម្រាប់ United កំពុង​ស្ថិត​នៅ​លេខ​៣ មាន​៣៩​ពិន្ទុ​ស្មើ​គ្នា​ ជាមួយ​ក្រុម​លេខ​ពីរ Man City៕ ​​
ព្រហស្បតិ៍ , 19 មករា 2023 79 អ្នកទស្សនា 11 ថ្ងៃកន្លងទៅ

Inter បំបាក់ AC Milan លើកពាន Italian Super Cup លើទឹកដីអារ៉ាប៊ីសាអ៊ូឌីត

(អន្តរជាតិ)៖ ក្លិប Inter Milan បាន​យក​ឈ្នះ​ក្លិប AC Milan ក្នុងលទ្ធផល ៣-០ លើក​ពាន Italian Super Cup លើ​ទឹក​ដី​អារ៉ាប៊ីសាអ៊ូឌីត ​កាល​ពី​យប់ថ្ងៃពុធ ទី១៨ ខែមករា ឆ្នាំ២០២៣នេះ​។ ក្នុង​ការ​ប្រកួតយប់មិញនេះ​ ខ្សែ​បម្រើ Federico Dimarco ជា​អ្នក​រក​បាន​គ្រាប់​ដំបូង​ឲ្យ Inter ក្រោយ​លេង​បាន​១០​នាទី ពេល Nicolo Barella ជា​អ្នក​បញ្ជូន​ឲ្យ។ អ្នក​ចាំ​ទី​របស់ Inter  កីឡាករ Andre Onana បាន​សង្គ្រោះ​បាល់​យ៉ាង​អស្ចារ្យ​ ពី​ការ​ប៉ុនប៉ង​​របស់​កីឡាករ Rafael Leao មុន​ពេល Dzeko ធ្វើ​បាន​គ្រាប់​ទី​២​ ឲ្យ ​Inter នៅនាទី២១ បញ្ជប់តង់ទី២ Inter Milan ២-០ AC Milan ។ លុះចូលដល់តង់ទីពីរ នាទី​៧៧ ​ខ្សែ​ប្រយុទ្ធ Lautaro Martinez ធ្វើ​បាន​គ្រាប់​ទី​៣​ ជូន Inter ដែល​ជា​គ្រាប់​ចុង​ក្រោយ​ជួយ​ក្រុម​ឈ្នះ AC Milan ៣-០។ នេះ​ជា​​លើក​ដំបូង ​​ដែល Inter អាច​យក​ឈ្នះ AC Milan នៅ​វគ្គ​ផ្ដាច់ព្រ័ត្រ​ពាន Cup ក្នុង​ប្រទេស​អ៊ីតាលី បន្ទាប់​ពី​ធ្លាប់​ចាញ់​នៅ Coppa Italia នៅ​ឆ្នាំ​​១៩៧៧ និង Italian Super Cup ឆ្នាំ​២០១១៕
ព្រហស្បតិ៍ , 19 មករា 2023 47 អ្នកទស្សនា 11 ថ្ងៃកន្លងទៅ

អត្ថបទពេញនិយម

អត្ថបទថ្មី