Kylian Mbappe បានអះអាងថា លទ្ធផលរបស់ PSG ទល់នឹង Bayern Munich នៅក្នុងក្របខ័ណ្ឌ Champions League មិនប៉ះពាល់ដល់អនាគតរបស់គាត់នៅក្លឹបបារាំងនេះទេ។ ជម្រាបផងដែរថា PSG នឹងត្រូវជួបជាមួយ Bayern Munich ក្នុងការប្រកួតជើងទី២ នៃក្របខណ្ឌ Champions League នៅយប់ថ្ងៃព្រហស្បតិ៍នេះ ដោយក្រុមកំពូលតារាង Ligue 1 បានចាញ់ក្នុងលទ្ធផល ១-០ កាលពីជើងទី១។ កីឡាកររូបនេះតែងតែមានពាក្យចចាមអារ៉ាមជាច្រើនជុំវិញការចាកចេញរបស់គាត់ ប៉ុន្តែយ៉ាងណាគាត់បានបញ្ជាក់ច្បាស់ហើយថា លទ្ធផលប្រកួតជាមួយ Bayern នឹងមិនប៉ះពាល់ដល់ការសម្រេចចិត្តរបស់គាត់នោះទេ។
ក្រោយពេលយកឈ្នះលើក្លឹប Nantes ក្នុងលទ្ធផល ៤-២ ខ្សែប្រយុទ្ធស្លាប Kylian Mbappe បាននិយាយថា៖«ប្រសិនបើការប្រកួតនេះ [Baryen] នឹងប៉ះពាល់ដល់អនាគតរបស់ខ្ញុំ? ខ្ញុំមិនគិតដូច្នេះទេ។ ប្រសិនបើខ្ញុំភ្ជាប់អនាគតរបស់ខ្ញុំនៅ Champions League ហើយមានការគោរពដល់ក្លឹប ខ្ញុំនឹងកាន់តែរីកចម្រើន! នៅទីនេះខ្ញុំសប្បាយចិត្ត ហើយនៅពេលនេះ ខ្ញុំមិនអាចគិតអ្វីផ្សេងក្រៅពីកសាងអ្វីល្អៗជាមួយ PSG នោះទេ»។ គួរឱ្យដឹងដែរថា Mbappe បានឈ្នះស្ទើរតែគ្រប់ពានកិត្តិយសទាំងអស់នៅក្នុងបាល់ទាត់សម្រាប់ទាំង PSG និងបារាំង ប៉ុន្តែភាពជោគជ័យនៅអឺរ៉ុបរបស់គាត់ គឺមិនស៊ីចង្វាក់គ្នានោះទេ។ វាទំនងថាគាត់នឹងបាត់បង់ឱកាសលើកពាន Champions League ជាថ្មីម្ដងទៀត ខណៈដែលក្រុមរបស់គាត់នឹងត្រូវទៅទឹកដីក្រុម Bayern នៅកីឡដ្ឋាន Allianz Arena ដើម្បដណ្ដើមទៅវគ្គ ៨ក្រុមចុងក្រោយ៕
