កីឡាករ Marcus Rashford បាននិយាយថា គាត់សូមជូនពរឱ្យ Manchester United អាចធ្វើបានប្រសើរឡើងវិញ បន្ទាប់ពីចាញ់ Liverpool ក្នុងលទ្ធផល ៧-០ នៅក្របខណ្ឌ Premier League កាលពីថ្ងៃអាទិត្យ។ លោក Erik ten Hag បានហៅការលេងនៅថ្ងៃនោះថា «គ្មានវិជ្ជាជីវៈ» នៅក្នុងបទសម្ភាសន៍ក្រោយការប្រកួតរបស់គាត់។ ទោះបីជាយ៉ាងណាក៏ដោយ Rashford បាននិយាយថា ក្រុមទាំងមូលត្រូវតែធានាថាការប្រកួតនោះ «នឹងមិនកំណត់រដូវកាលរបស់ពួកគេទេ»។
ខ្សែប្រយុទ្ធរូបនេះបានសរសេរនៅលើ Twitter ថា៖«ខ្ញុំសង្ឃឹមថាយើងអាចលេងនៅថ្ងៃនេះ ដើម្បីព្យាយាម និងធ្វើឱ្យបានល្អឡើងវិញ។ លទ្ធផលគឺជាលទ្ធផល ហើយយើងមិនអាចមើលរំលងនោះទេ! យើងមិនត្រូវអនុញ្ញាតឱ្យវាកំណត់រដូវកាលរបស់យើងទេ។ យើងត្រូវតែជឿជាក់លើដំណើរការ ហើយនៅជាប់ជាមួយគ្នា»។ ការប្រកួតនោះគឺជាបរាជ័យដ៏ធ្ងន់បំផុតរបស់ Man Utd ហើយជាលទ្ធផលដ៏អាក្រក់បំផុតរបស់ពួកគេទល់នឹង Liverpool។
ចំណែកការចាញ់ ៣ លើកមុនរបស់ពួកគេដោយមានរហូតដល់ ៧គ្រាប់ បានកើតឡើងទល់នឹង Blackburn Rovers ក្នុងឆ្នាំ១៩២៦ Aston Villa ក្នុងឆ្នាំ១៩៣០ និង Wolverhampton Wanderers ក្នុងឆ្នាំ១៩៣១។ ជម្រាបដែរថា Manchester United នឹងត្រូវធ្វើជាម្ចាស់ផ្ទះទទួល Real Betis ក្នុងការប្រកួត Europa League វគ្គ១៦ក្រុមចុងក្រោយជើងទី១ នៅថ្ងៃព្រហស្បតិ៍ មុនពេលប្រកួតជាមួយ Southampton ក្នុង Premier League នៅថ្ងៃអាទិត្យ៕
