លោក Antonio Conte បាននិយាយថា គាត់រីករាយក្នុងការបន្តធ្វើជាគ្រូបង្វឹករបស់ Tottenham Hotspur បន្ទាប់ពីក្រុមរបស់គាត់ បានធ្លាក់ចេញពីក្របខ័ណ្ឌ Champions League ដ៏ទៅឱ្យក្រុម AC Milan។ ម្ចាស់ផ្ទះ Spurs បានធ្លាក់ចេញពី UCL ក្នុងលទ្ធផលសរុប ១-០ បន្ទាប់ពីការប្រកួតជើងទី២ នៅទឹកដីទីក្រុងឡុងដ៍ខាងជើងយប់មិញនេះបានត្រឹម ០-០ ហើយធ្វើឱ្យអ្នកគាំទ្រ Spurs សម្តែងការខឹងសម្បារយ៉ាងខ្លាំងចំពោះគ្រូបង្វឹកសញ្ជាតិអ៊ីតាលីរូបនេះ នៅពេលសំឡេងកញ្ចែពេញម៉ោងបន្លឺឡើង។
រំលឹកដែរថា Spurs ធ្លាក់ចេញពី FA Cup ទៅក្រុម Sheffield United កាលពីមួយសប្តាហ៍មុន ហើយឆ្នាំ ២០២២-២៣ នឹងក្លាយជារដូវកាលគ្មានពានរង្វាន់សម្រាប់ Spurs ជាថ្មីម្ដងទៀត ហើយចំណាត់ថ្នាក់កំពូលទាំងបួនរបស់ពួកគេក៏ស្ថិតនៅក្រោមការគំរាមកំហែងដ៏ធំផងដែរ។ មានការរំពឹងទុកកាន់តែខ្លាំងឡើងអំពីអនាគតរបស់លោកគ្រូវ័យ ៥៣ឆ្នាំ ប៉ុន្តែនៅក្នុងសន្និសីទសារព័ត៌មានក្រោយការប្រកួតរបស់គាត់ មិនមានសញ្ញាណាមួយនៃការចាកចេញដែលជិតមកដល់នោះទេ។ លោក Conte បាននិយាយថា៖«នេះមិនមែនជាថ្ងៃត្រឹមត្រូវក្នុងការនិយាយអំពីអនាគតរបស់ខ្ញុំ ប៉ុន្តែខ្ញុំមានកុងត្រាជាមួយ Tottenham។ ក្លឹបដឹងច្បាស់ពីគំនិតរបស់ខ្ញុំ។ នៅចុងបញ្ចប់នៃរដូវកាលនេះ យើងនឹងជួបគ្នា ហើយបន្ទាប់មកយើងនឹងធ្វើការសម្រេចចិត្តរួម»៕
