Eric Maxim Choupo-Moting បានស៊ុតបញ្ចូលទីនាំមុខ Paris Saint-Germain ដែលជាអតីតក្រុមចាស់របស់ខ្លួន នាំឱ្យក្រុម Bayern Munich ឈានដល់វគ្គពាក់កណ្តាលផ្តាច់ព្រ័ត្រនៃក្របខ័ណ្ឌ Champions League ជាមួយនឹងជ័យជម្នះ ២-០ ខណៈមានគ្រាប់បាល់សរុបចំនួន ៣-០។ ក្រុមរបស់លោក Julian Nagelsmann បានឈានទៅវគ្គ ៨ ក្រុមចុងក្រោយ សម្រាប់រដូវកាលទី៤ជាប់ៗគ្នា បន្ទាប់ពីការស៊ុតបាល់បញ្ចូលទីរបស់ Choupo-Moting និង Serge Gnabry ក្នុងការប្រកួតជើងទី២ កាលពីយប់មិញនេះ។
ការបរាជ័យរបស់ PSG ក្នុងក្របខ័ណ្ឌ Champions League កាលពីរដូវកាលមុន ដែលក្នុងនោះពួកគេបានចាញ់ការប្រកួតក្នុងវគ្គ១៦ ក្រុមចុងក្រោយជាមួយនឹង Real Madrid បានធ្វើឱ្យគ្រូបង្វឹកចាស់ Mauricio Pochettino ត្រូវបានគេបណ្តេញចេញ។ ឥឡូវនេះលោកគ្រូបច្ចុប្បន្ន Christophe Galtier អាចនឹងទទួលរងនូវជោគវាសនាស្រដៀងគ្នានេះ បើទោះជាមាន ៨ពិន្ទុដាច់ នៅលើកំពូល Ligue 1 ក៏ដោយ។ ចំណែកកីឡាករ Mbappé នឹងមិននិយាយអំពីអនាគតរបស់ខ្លួនជាមួយ PSG នោះទេ ស្របពេលដែលកុងត្រារបស់ Messi និង PSG នៅជាប់គាំងនៅឡើយ៕
