ក្លឹប Barcelona ត្រូវបានចោទប្រកាន់ពីបទពុករលួយ ជុំវិញការបង់ប្រាក់ទៅឱ្យអតីតអនុប្រធានគណៈកម្មាធិការអាជ្ញាកណ្តាលអេស្ប៉ាញ នេះបើតាមការឱ្យដឹងដោយសារព័ត៌មាន DailyMail។ រដ្ឋអាជ្ញាសាធារណៈរបស់អេស្ប៉ាញបានចោទប្រកាន់ថា ក្លឹបបានរក្សាទំនាក់ទំនងជាមួយលោក Jose Maria Enriquez Negreira ដោយការបង់ប្រាក់ ដែលនាំឱ្យ Barcelona ទទួលផលចំណេញលើការសម្រេចចិត្តរបស់អាជ្ញាកណ្តាល។ រដ្ឋអាជ្ញាបាននិយាយថា លុយចំនួន ៧.៣ លានអឺរ៉ូ ត្រូវបានបង់ដោយក្លឹប Barcelona ទៅឱ្យ DASNIL និង NILSAT ដែលជាក្រុមហ៊ុនគ្រងដោយលោក Negreira ។
ក្លឹបអាចប្រឈមនឹងការពិន័យផ្នែកហិរញ្ញវត្ថុដ៏ធំ ហើយលោក Negreira, អតីតប្រធានក្លឹប Barcelona លោក Sandro Rosell និង Josep Bartomeu និងអតីតនាយកលោក Oscar Grau និងលោក Albert Soler អាចប្រឈមមុខនឹងការជាប់ពន្ធនាគាររហូតដល់ ៤ឆ្នាំ។ ឥឡូវនេះ តុលាការនឹងត្រូវសម្រេចថា តើមានភស្តុតាងគ្រប់គ្រាន់ដើម្បីបញ្ជាក់ថាលោក Negreira បានប្រើប្រាស់ប្រាក់ដែលបានបង់ទៅឱ្យគាត់ដោយក្លឹប Barcelona ដើម្បីជាថ្នូរឱ្យអាជ្ញាកណ្ដាលកាត់សេចក្ដីឱ្យក្លឹបមានប្រៀបជាង នៅពេលមានប្រកួតដែរ ឬទេ៕
