ក្លឹប Real Madrid បាននិយាយថា ពួកគេនឹងគាំទ្រការចោទប្រកាន់ក្លឹប Barcelona លើករណីពុករលួយពាក់ព័ន្ធនឹងប្រាក់ដែលបានបង់ទៅឱ្យអនុប្រធានគណៈកម្មាធិការអាជ្ញាកណ្តាលអេស្ប៉ាញ។ Real Madrid រៀបចំដើម្បីការពារផលប្រយោជន៍របស់ពួកគេ នៅពេលដែលដំណើរចោទប្រកាន់ក្លឹប Barcelona នឹងចាប់ផ្ដើម។ កាលពីថ្ងៃសុក្រ តុលាការបានបើកសវនាការជំនុំជម្រះក្រុម Barcelona ពីបទពុករលួយ រំលោភលើទំនុកចិត្ត និងកំណត់ត្រាអាជីវកម្មមិនពិត។
ព្រះរាជអាជ្ញាចោទប្រកាន់ថា Barcelona បានបង់ប្រាក់ ៨.៤ លានអឺរ៉ូ ទៅឱ្យលោក Jose Maria Enriquez Negreira និងក្រុមហ៊ុនរបស់គាត់ ជាថ្នូរជួយដល់ការសម្រេចចិត្តរបស់អាជ្ញាកណ្តាល។ ចំណែក Barcelona ដែលបានបដិសេធរាល់ការចោទប្រកាន់បានទទួលស្គាល់ថា ការបង់ប្រាក់ត្រូវបានធ្វើឡើងទៅឱ្យ Dasnil 95 ចន្លោះឆ្នាំ២០០១ និង ២០១៨។ ក្លឹបកាតាឡានបានពណ៌នាក្រុមហ៊ុនថា «ជាអ្នកប្រឹក្សាបច្ចេកទេសខាងក្រៅ» ដែលក្លឹបបានបង់ប្រាក់ដើម្បីចងក្រងរបាយការណ៍វីដេអូទាក់ទងនឹងអាជ្ញាកណ្តាល «ក្នុងគោលបំណងបំពេញបន្ថែមនូវព័ត៌មានដែលបុគ្គលិកគ្រូបង្វឹកត្រូវការ»។ អតីតប្រធានក្លឹប Barcelona លោក Josep Maria Bartomeu និង Sandro Rosell ក៏ដូចជាលោក Negreira សុទ្ធតែប្រឈមនឹងការចោទប្រកាន់នេះ៕
