លោកគ្រូ Jurgen Klopp មានការខកចិត្តយ៉ាងខ្លាំងដែលក្រុម Liverpool មិនអាចលេងឱ្យបានល្អទទល់នឹង Real Madrid ហើយត្រូវធ្លាក់ចេញពី Champions League នៅត្រឹមវគ្គ ១៦ ក្រុមចុងក្រោយនេះ។ Liverpool បានធ្វើដំណើរទៅកាន់កីឡដ្ឋាន Santiago Bernabeu សម្រាប់ការប្រកួតជើងទី២ ជាមួយនឹងការងារដ៏ធំមួយ បន្ទាប់ពីពួកគេបានចាញ់យ៉ាងអាម៉ាស់ ៥-២ កាលពីជើងទី១។ យ៉ាងណាក៏ដោយ ក្រុមហង្សក្រហមមិនអាចធ្វើបានល្អឡើយ ខណៈពួកគេបានចាញ់ម្ដងទៀតក្នុងលទ្ធផល ១-០ ដោយការស៊ុតបញ្ចូលទីរបស់កីឡាករ Karim Benzema ដែលនាំឱ្យលទ្ធផលទាំងពីរជើងគឺ ៦-២ ។
ខណៈដែលបរាជ័យយ៉ាងធ្ងន់ធ្ងរនៅទឹកដី Anfield អាចនឹងពិបាកក្នុងការស្រោចស្រង់ Liverpool ឡើងវិញ លោកគ្រូ Klopp បានទទួលស្គាល់ថា បើទោះបីជាកាលពីក្នុងការប្រកួតជើងទី១ នៅទឹកដី Anfield មានលទ្ធផលស្មើគ្នា ក៏វាមិនគ្រប់គ្រាន់សម្រាប់ Liverpool នោះដែរ។ លោក Klopp បានប្រាប់ BT Sport ថា៖«និយាយឱ្យត្រង់ទៅប្រសិនបើយើងស្មើនៅផ្ទះ [Anfield] ហើយលេងដូចរបៀបដែលយើងលេងនេះ យើងក៏នៅតែធ្លាក់ដដែល»។ លោកបានបន្ថែមថា៖«យើងមិនអាចមកទីនេះ ហើយសង្ឃឹមទទួលបានផ្លែផ្កានោះទេ។ ពួកយើងបានត្រៀមខ្លួនសម្រាប់ការលេងដ៏ពិសេសមួយ ប៉ុន្តែពួកយើងមិនអាចសម្ដែងវាចេញមកបានទេនៅក្នុងការប្រកួតយប់នេះ»៕
