លោកគ្រូ Carlo Ancelotti បានទទូចថា Real Madrid សមនឹងឈ្នះ Barcelona ខណៈដែលគ្រូបង្វឹកក្លឹប Los Blancos រូបនេះ មានមន្ទិលលើការសម្រេចចិត្តយឺតយ៉ាវរបស់ VAR ចំពោះគ្រាប់បាល់ Offside របស់ Marco Asensio នៅក្នុងការប្រកួត El Clasico យប់មិញនេះ។ កីឡាករ Asensio បានអបអរគ្រាប់បាល់របស់ខ្លួននៅកីឡដ្ឋាន Camp Nou ក្រោយស៊ុតបញ្ចូលទីដោយការបញ្ជូនបាល់ចេញពីជើង Dani Carvajal នៅនាទីទី៨១ ប៉ុន្តែការត្រួតពិនិត្យ VAR ដ៏វែងមួយ បាននាំឱ្យមានការសម្រេចចិត្តថា គ្រាប់បាល់នោះគឺជាគ្រាប់ជំហរក្រៅល្បែង (Offside)។
ក្រោយមកបាន ១១នាទី កីឡាករ Franck Kessie បានបំបែកសំណាញ់ទីរបស់ Thibaut Courtois ដែលធ្វើឱ្យ Barcelona ដណ្តើមបានជ័យជម្នះនៅចុងម៉ោង មានរហូតដល់ទៅ ១២ ពិន្ទុដាច់នៅកំពូលតារាង LaLiga។ យ៉ាងណាក៏ដោយ Ancelotti មិនសុខចិត្តចំពោះការសម្រេចចិត្តមិនឱ្យគ្រាប់បាល់មក Asensio ដែលមានជំហរហួសពីខ្សែការពារ Jules Kounde នោះទេ ហើយក៏បានកោតសរសើរចំពោះទម្រង់លេងដ៏រឹងមាំរបស់ Madrid បើទោះបីជាចាញ់ការប្រកួតនេះ។
គ្រូបង្វឹកសញ្ជាតិអ៊ីតាលីបាននិយាយទៅកាន់ Movistar ថា៖«អ្នកត្រូវតែទទួលយក [ការសម្រេចចិត្ត] ប៉ុន្តែខ្ញុំនៅតែមានមន្ទិលសង្ស័យ។ ប្រាកដណាស់វាគ្មានអ្វីធំដំទេ។ យើងមានសិទ្ធិក្នុងការសង្ស័យ»។ លោកបានបន្ដថា៖«យើងបានលេងការប្រកួតដ៏ល្អមួយ យើងសមនឹងទទួលជ័យជម្នះ។ ប៉ុន្តែបន្ទាប់មកគ្រាប់បាល់មិនត្រូវបានអនុញ្ញាត។ យើងបានព្យាយាមគ្រប់យ៉ាងនៅចុងម៉ោង យើងបានបាត់បង់តុល្យភាពបន្តិច ហើយពួកគេក៏បានស៊ុតបញ្ចូលទី។ ការប្រកួតនេះគឺល្អណាស់ យើងចាកចេញដោយមានទំនុកចិត្តថា យើងអាចបញ្ចប់រដូវកាលបានយ៉ាងល្អ»៕
