(បាល់ទាត់)៖ អតីតអ្នកចាត់ការទូទៅរបស់កាំភ្លើងធំ Arsenal លោក Arsene Wenger បានត្រឡប់មកកាន់កីឡដ្ឋាន Emirates ជាលើកដំបូង ចាប់តាំងពីខែឧសភា ឆ្នាំ២០១៨ ដើម្បីទស្សនាការប្រកួតរវាង Arsenal ទល់នឹង West Ham។
ការប្រកួតក្របខណ្ឌ Premier League កាលពីយប់មិញ កាំភ្លើងធំ បានយកឈ្នះញញួរយក្ស ក្នុងលទ្ធផល ៣-១ បន្តនាំមុខក្នុងតារាងពិន្ទុ។ ការប្រកួតនេះ West Ham បានបើកការនាំមុខមុនដោយកីឡាករ Benrahma តាមរយៈការទាត់ប៉េណាល់ទី។ យ៉ាងណាមិញ Arsenal បានវាយបករកបាន៣គ្រាប់សងវិញ ធ្វើបានដោយកីឡាករ Saka, Martinelli និង Nketiah។
វាគឺជាប្រកួតដំបូង ដែលលោក Wenger ចូលទស្សនា ចាប់តាំងពីចាកចេញជាអ្នកចាត់ការ។ បុរសវ័យ ៧៣ឆ្នាំបានចំណាយពេល២២ឆ្នាំ ជាមួយ Arsenal ចូលដឹកនាំរវាងឆ្នាំ១៩៩៦ រហូងដល់ ២០១៨។ លោកបានចាកចេញពីក្លិប ក្រោយមិនអាចជួយក្រុមឡើងទៅលេងនៅ Champions League។
លោកត្រូវបានជំនួសកន្លែងដោយលោក Unai Emery ដែលបច្ចុប្បន្ន ជាគ្រូរបស់ Aston Villa មុនពេល Mikel Arteta ចូលកាន់តំណែង ក្នុងឆ្នាំ២០១៩ រហូតដល់បច្ចុប្បន្ន។ Arsenal ពេលនេះកំពុងសម្លឹងក្លាយជាជើងឯក Premier League ជាលើកដំបូង ចាប់តាំងពីឆ្នាំ២០០៤ ខណៈកំពុងគម្លាតពិន្ទុលើ Man City ដល់ទៅ ៨ពិន្ទុ៕
