ស្មាត់ យុន គិតថា មុនប្រកួតអាចស៊ីក្រុម ម៉េងហ៊ួង ៣- ១ ដល់លេងជាក់ស្ដែងទើបភ្ញាក់ផ្អើល
ស្មាត់ យុន កីឡាករឆ្នើមក្នុងក្រុម ពង្រូលកំពង់ស្ពឺ បានលើកឡើងថា មុនប្រកួតក្រុមខ្លួនវិភាគឃើញពីសមត្ថភាពរបស់ក្រុម ធី ម៉េងហ៊ួង ឬ ត្រីឆ្លាំងភ្នំពេញ មិនមែនជាដៃគូរបស់ខ្លួនឡើយ ពោលគឺយ៉ាងហោចណាស់ក្រុមខ្លួនអាចស៊ី៣-១ ដែរ តែដល់ពេលការប្រកួតជាក់ស្ដែងហាក់មានភាពភ្ញាក់ផ្អើល ពោលបែរមានការប្រកួតប្រជែងខ្លាំងវ៉ៃរហូតដល់ ៥សិត ជាលទ្ធផលគឺក្រុមមកពីខេត្តកំពង់ស្ពឺឈ្នះ ៣-២ ជាមួយពិន្ទុប្រផិតប្រផើយ។
ការលើកឡើងខាងលើបានធ្វើឡើងក្រោយពេលក្រុមពង្រូលឈ្នះជើងឯក Slamball កាលពីល្ងាចម្សិលមិញនេះនៅតារាងបាល់ទះវិសាខា។ ព្រឹត្តិការណ៍ Slamball រដូវកាលទី១នេះបានដំណើរការអស់រយៈពេលជិត៤ខែមកហើយ ទម្រាំអាចឈានដល់ការប្រកួតផ្ដាច់ព្រ័ត្រ កាលពីម្សិលមិញ បន្ទាប់ពីឆ្លងកាត់ការប្រកួតជម្រុះតាមបណ្ដាខេត្តពីមួយដំណាក់កាលទៅមួយដំណាក់កាល។
ក្រោយការប្រកួត និងបានក្លាយជាជើងឯកជាមួយប្រាក់រង្វាន់ ៥ ពាន់ដុល្លារ ស្មាត់ យុន ដែលត្រូវបានគេស្គាល់ឈ្មោះពិតថា ទុយ កុសល បានលើកឡើងថា «មុនការប្រកួតខ្ញុំគិតថា យ៉ាងខំណាស់ក៏ខ្ញុំស៊ី៣-១ដែរ តែដល់ពេលលេងជាក់ស្ដែងខ្ញុំឃើញថា គេល្អដែរ ចឹងយើងពិបាកដែរ។ ចំណុចដែលធ្វើឲ្យក្រុមខ្ញុំពិបាកស៊ីគេដែរហ្នឹង ព្រោះថា យើងលេងមិនសូវត្រូវគ្នា»។
កីឡាករមកពីខេត្តកំពតដដែលបន្ថែមថា ទាក់ទងការការរៀបចំព្រឹត្តិការណ៍ខាងលើពិតជាល្អមែនទែន ព្រោះបានធ្វើការប្រកួតតាមបណ្ដាខេត្ត ពិសេសប្រជាពលរដ្ឋនៅតាមបណ្ដាខេត្តមានការគាំទ្រខ្លាំង។ គេសង្ឃឹមថា ក្រុមហ៊ុនស្រាបៀរ Angchor នឹងរៀបចំរដូវកាលទី២ ហើយក្នុងនាមជាក្រុមឈ្នះជើងឯកធានាថា នឹងចូលរួមប្រកួតការពារដំណែងជើងឯកមួយនេះផងដែរ។
គួររម្លឹកថា ព្រឹត្តិការណ៍ Slamball រដូវកាលទី១ បានចាប់ផ្ដើមដំណើរការប្រកួតចាប់ពីថ្ងៃទី៥ ខែវិច្ឆិកា ឆ្នាំ២០២២ ដោយមានក្រុម-ខេត្តចំនួន៨ បានចុះឈ្មោះចូលរួម ជាលទ្ធផលក្រុមពង្រូលកំពង់ស្ពឺបានក្លាយជាជើងឯក ដោយគ្រងទឹកប្រាក់ ៥ ពាន់ដុល្លារ លេខ២បានទៅក្រុមត្រីឆ្លាំងភ្នំពេញទទួលបានប្រាក់រង្វាន់៣ ពាន់ដុល្លារ និងលេខ៣ បានទៅលើក្រុមដំរីសៀមរាប ទទួលបានប្រាក់រង្វាន់ ១៥០០ ដុល្លារអាមេរិក៕
អាទិត្យ , 29 មករា 2023 41 អ្នកទស្សនា 1 ថ្ងៃកន្លងទៅ
ក្រោយបានឱកាសជាប្រធានសហព័ន្ធកីឡាបេស្បលថ្មី លោក ឆែម តារា មានការតាំងចិត្តខ្ពស់
លោក ឆែម តារា ត្រូវបានគណ:កម្មការប្រតិបត្តិផ្តល់ទំនុកចិត្ត និងបោះឆ្នោតជាប់ជាប្រធានសហព័ន្ធកីឡាបេស្បលកម្ពុជា Cambodian Baseball Federation (CBF) អាណត្តិថ្មី ឆ្នាំ២០២៣-២០២៧ ។នាព្រឹកថ្ងៃទី២៨ ខែមករា ឆ្នាំ២០២៣។
សហព័ន្ធកីឡាបេស្បលកម្ពុជា បានរៀបចំមហាសន្និបាតក្នុងការបញ្ចប់អាណត្តិទី៥ ឆ្នាំ២០១៩ - ឆ្នាំ២០២៣ និងបន្តអាណត្តិឆ្នាំ២០២៣ - ឆ្នាំ២០២៧ ក្រោមអធិបតីភាពដ៏ខ្ពង់ខ្ពស់របស់ ឯកឧត្តម ញ៉ែម ថាវី អតីតប្រធានសហព័ន្ធកីឡាបេស្បលកម្ពុជា និងជាទីប្រឹក្សាជាន់ខ្ពស់នៃរដ្ឋសភា និងលោក ដួង មាសចំរើន អគ្គនាយករង នៃអគ្គយកដ្ឋានកីឡា និងជាតំណាងដ៏ខ្ពង់ខ្ពស់របស់ឯកឧត្តមបណ្ឌិតសភាចារ្យ ហង់ជួនណារ៉ុន ជាគណៈអធិបតី។
ក្នុងនាម ប្រធានអាណត្តិថ្មី លោក ឆែម តារា បានបង្ហាញការតាំងចិត្តដូច្នេះ "ខ្ញុំបាទ លោក ឆែម តារា ពិតជាសប្បាយចិត្តជាក្រៃលែងដែលត្រូវបានអង្គសន្និបាត ដែលមានសមាជិកទាំង ៤៨រូប បានធ្វើការបោះឆ្នោតជ្រើសរើសអោយមានគណៈកម្មាការប្រតិបត្តិ ៩រូប និងបានបោះឆ្នោតជ្រើសតាំង ឲ្យជាប់ជា ប្រធានសហព័ន្ធកីឡាបេសប្បលកម្ពុជា កាលពីព្រឹកថ្ងៃសៅរ៍ ទី២៨ ខែមករា ឆ្នាំ២០២៣ កន្លងទៅនេះ» ។
លោកបានធ្វើការបន្ថែមជាចុងក្រោយថា « ខ្ញុំនឹងប្ដេជ្ញាចិត្តយ៉ាងមុតមាំថា នឹងខិតខំដឹកនាំ ព្រមទាំងចងមិត្តភាពសហការជាមួយមិត្តភ័ក្ដិបរទេសផ្សេងៗ ដែលមានបំណងចង់ចូលរួមអភិវឌ្ឍន៍វិស័យបេស្បលកម្ពុជាយើងទាំងអស់នៅក្នុងអាណត្តិថ្មីនេះ ជាហេតុក្នុងការធ្វើឲ្យវិស័យកីឡាបេស្បល សុហ្វបលកម្ពុជាមាន ការរីកចំរើនកាន់តែខ្លាំង និងកាន់តែមានប្រជាប្រិយភាពខ្ពស់ ជា ពិសេសមានកេរ្តិ៍ឈ្មោះល្បីល្បាញទាំងជាតិ និងឆាកអន្តរជាតិ» ៕
សៅរ៍ , 28 មករា 2023 221 អ្នកទស្សនា 2 ថ្ងៃកន្លងទៅ
ប្រធានសហព័ន្ធកីឡាសូហ្វតិន្នីសកម្ពុជា ជម្រុញអោយសិក្ខាកាម ត្រូវដុះខាត់ផ្នែកភាសារបន្ថែម ដើម្បីចូលរួមកាត់សេចក្តីក្នុងការប្រកួតអន្តរជាតិ ប្រកបដោយគុណភាព
ឯកឧត្តម សរ សិទ្ធិ ប្រធានសហព័ន្ធកីឡាសូហ្វតិន្នីសកម្ពុជាជម្រុញអោយសិក្ខាកាម ដែលជាគ្រូបច្ចេកទេស ត្រូវដុះខាត់ផ្នែកភាសារបន្ថែម ដើម្បីចូលរួមកាត់សេចក្តីក្នុងការប្រកួតអន្តរជាតិ ប្រកបដោយគុណភាព ។ ការជម្រុញរបស់ឯកឧត្តមប្រធាន ក្នុងឱកាសអញ្ជើញបិទ វគ្គបណ្តុះបណ្តាល មន្រ្តីបច្ចេកទេស និងអាជ្ញាកណ្តាល ថ្នាក់ជាតិ ឆ្នាំ២០២៣ នៅទីលានកីឡាសូហ្វតិន្នីស ក្នុងពហុកីឡដ្ឋានអូឡាំពិក នាថ្ងៃទី១៦ ខែមករា ឆ្នាំ២០២៣ ម្សិលមិញ ។
បើតាមរបាយការណ៍របស់ឯកឧត្តម យិត ភីរ: អគ្គលេខាធិការ នៃអគ្គលេខាធិការដ្ឋានក្រុមប្រឹក្សាកីឡាក្រសួងមហាផ្ទៃ និងជាអគ្គលេខាធិការសហព័ន្ធកីឡាសូហ្វតិន្នីសកម្ពុជា បានអោយដឹងថា ” វគ្គបណ្តុះបណ្តាលមន្រ្តីបច្ចេកទេស និងអាជ្ញាកណ្តាល ថ្នាក់ជាតិ ឆ្នាំ២០២៣ នេះអាចដំណើរការទៅបានដោយ ទទួលបានអនុញ្ញាតគោលកាណ៍ដ៏ខ្ពង់ខ្ពស់ពី ឯកឧត្តមប្រធានសហព័ន្ធ និងទទួលបានថវិកាគំាទ្រពីក្រសួងអប់រំ យុវជន និងកីឡា ដោយមានគ្រូឧទ្ទេសប្រចាំវគ្គ ចំនួន ០២ រូបគឺលោក OGIWARA Masato ជនជាតិជប៉ុន រួមជាមួយលោក យី សារិន ជនជាតិខ្មែរ ដោយមានអ្នកសម្របសម្រួល លោក វ៉ង់ វុទ្ធា រួមជាមួយជំនួយការ កញ្ញា ឃនសាត សាន្នីតា និងមានសិក្ខាកាម សរុបចំនួន ៣៦ រូប ។ អគ្គលេខាធិការ ខាងលើក្នុងនាម សហព័ន្ធកីឡាសូហ្វតិន្នីសកម្ពុជា សូមប្តេជ្ញាយ៉ាងមោះមុត និងបន្តរក្សាការខិតខំប្រឹងប្រែងលើគ្រប់ការងារទាំងអស់រួមទាំងការបណ្តុះបណ្តាលធនធាន ជាពិសេស ពង្រឹងនូវវិស័យប្រភេទកីឡាមួយនេះ ឲ្យមានការអភិវឌ្ឍទៅមុខទាំងហេដ្ឋារចនាសម្ព័ន្ធ និងបន្តខិតខំអភិវឌ្ឍសមត្ថភាព និងពង្រឹងកីឡាករ កីឡាការិនី ឲ្យទទួលបានគុណភាពខ្ពស់ ដើម្បីត្រៀមលក្ខណៈចូលរួមប្រកួតថ្នាក់ជាតិ និងអន្តរជាតិ ជាពិសេសត្រៀមចូលរួមក្នុងព្រឹត្តិការណ៍ប្រកួតកីឡា SEA Games លើកទី ៣២ ឆ្នាំ ២០២៣ ដែលកម្ពុជាធ្វើជាម្ចាស់ផ្ទះ ។
ឯកឧត្តម សរ សិទ្ធិ ប្រធានសហព័ន្ធកីឡាសូហ្វតិន្នីសកម្ពុជា បានមានប្រសាសន៍ថា វគ្គបណ្តុះបណ្តាលនេះ នឹងជួយដល់សិក្ខាកាមដែលបានចូលរួមទាំងអស់ ស្វែងយល់អំពីបច្ចេកទេស សម្រាប់ត្រៀមខ្លួនមុន ស៊ីហ្គេម លើកទី៣២ ឆ្នាំ២០២៣ឈានចូលមកដល់ ។ ឯកឧត្តម សរ សិទ្ធិ សហព័ន្ធកីឡាសូហ្វតិន្នីស ពីមុនយើងមានបញ្ហាប្រឈមតិចតួច ប៉ុន្តែឥឡូវយើងបានហ្វឹកហាត់ដុសខាត់ បច្ចេកទេសរបស់ យើងអាចទៅ ចូលរួមប្រកួតប្រជែង ក្នុងនាមជាម្ចាស់ផ្ទះ នៃចលនាប្រកួតកីឡាអន្តរជាតិ លើកទី១ ដូច្នេះយើងត្រូវទាមទារខ្លួនយើង ដុសខាត់សមត្ថភាពឲ្យស្គាល់ពីក្បួនច្បាប់នៃការប្រកួត ។ ឯកឧត្តម ប្រធានបន្តថាព្រោះកាលណានៅពេលដែលយើងក្លាយជាអាជ្ញាកណ្តាល ចូលរួមកាត់សេចក្ដី ក្នុងនាមយើងជាម្ចាស់ផ្ទះ តែយើងមិនស្គាល់ ពីច្បាប់ទម្លាប់ បច្ចេកទេសក្នុងការកាត់សេចក្ដី នៅក្នុងការប្រកួត នោះយើងនឹងមាន បញ្ហាប្រឈមមួយផ្នែកធំ ។ ឯកឧត្តម សរ សិទ្ធិ សង្កត់ធ្ងន់ថា បញ្ហាប្រឈមដ៏ធំរបស់យើងមួយទៀត គឺពាក់ព័ន្ធនឹងភាសា ព្រោះការប្រកួតនៅថ្នាក់អន្តរជាតិ យើងមិនអាចប្រើភាសា ខ្មែរយើងបានទេ យើងត្រូវប្រើភាសាអន្តរជាតិ គឺភាសាអង់គ្លេស ដែលគេប្រើទូទៅ គ្រប់បណ្ដាប្រទេសដែលជាសមាជិកអាស៊ានទាំង១០ «អ៊ីចឹងខ្ញុំជឿថាលោកគ្រូ អ្នកគ្រូ ដែលជាគ្រូបច្ចេកទេស អាជ្ញាកណ្តាល នឹងខិតខំ ដុសខាត់ខាងភាសាបន្ថែមទៀត ព្រោះភាសាកាលណាយើងនិយាយខុស វាអាចធ្វើឲ្យយើងកាត់សេចក្ដី ប្រាសចាកពីបច្ចេកទេសរបស់យើង ។ អ៊ីចឹងការប្រើភាសារបសស់យើងទាមទារឲ្យមានការប្រយ័ត្នផងដែរ បើទោះបីជាយើងចេះបច្ចេកទេសក៏ដោយ តែភាសាក៏ជាផ្នែកមួយដែលពាក់ព័ន្ធជាមួយបច្ចេកទេស របស់យើងផងដែរ »។
សូមជម្រាប់ថា វគ្គបណ្តុះបណ្តាលមន្រ្តីបច្ចេកទេស និងអាជ្ញាកណ្តាល ថ្នាក់ជាតិ ចាប់ពីថ្ងៃទី០៩ ដល់ ថ្ងៃទី១៣ ខែមករា ឆ្នាំ២០២៣ នៅមជ្ឈមណ្ឌលកីឡា ក្នុងពហុកីឡដ្ឋានជាតិ រាជធានីភ្នំពេញ ប្រកបដោយភាពជោគជ័យ ។ ឆ្លងកាត់វគ្គបណ្តុះបណ្តាលនេះ សិក្ខាកាមទាំងអស់ទទួលបាននូវការយល់ដឹង និងបន្ថែមនូវបទពិសោធថ្មីៗដែលមានលទ្ធផលទទួលបាននិទ្ទេសល្អ ៧០% ល្អបង្គួរ ២០% និងមធ្យម ១០% ។
អង្គារ , 17 មករា 2023 59 អ្នកទស្សនា 13 ថ្ងៃកន្លងទៅ
មិត្តភាពមិនផ្លាស់ប្ដូរ! Marcelo ទាត់បញ្ចូលទី ហើយអបអរបានស្ទីលរបស់ Ronaldo
ខ្សែការពារឆ្វេង Marcelo បានអបអរតាមស្ទីល "Sui” របស់ Cristiano Ronaldo បន្ទាប់ពីទាត់បញ្ចូលទីឲ្យក្លិប Olympiacos ក្នុងការប្រកួតពានរង្វាន់ Greek Cup។កីឡាករសញ្ជាតិប្រេស៊ីល រកបានគ្រាប់បាល់ក្នុងជំនួប Olympiacos ប្រកួតស្មើគ្នា ២-២ ជាមួយក្រុម Atromitos។ គ្រាប់បាល់របស់ Marcelo កើតឡើង អំឡុងពេលលទ្ធផលរវាងក្រុមទាំងពីរកំពុងស្មើគ្នា ១-១។ ប៉ុន្តែលទ្ធផលបានស្មើគ្នាម្ដងទៀត ក្រោយពេលកីឡាករ Kostas Kotsopoulos រកបានគ្រាប់ទីពីរឲ្យ Atromitos។
ត្បិតបញ្ចប់ការប្រកួតស្មើគ្នាបែបនេះក្ដី Olympiacos នៅតែអាចឡើងទៅកាន់វគ្គ៨ក្រុមចុងក្រោយពានរង្វាន់ Greek Cup ក្រោយសរុបគ្រាប់បាល់ទាំងពីរជើងពួកគេឈ្នះ ៦-៣។ អ្វីដែលគួរចាប់អារម្មណ៍ ក្រោយពេល Marcelo ទាត់បញ្ចូលទី គេបានអបអរតាមស្វីលរបស់មិត្តចាស់ Ronaldo ដែលជាការបង្ហាញការនឹកឃើញដល់គ្នា។
គួរបញ្ជាក់ថា Marcelo បានចាកចេញពី Real Madrid ក្រោយចំណាយពេល១៥ឆ្នាំ និងជាដៃគូយ៉ាងស្និទ្ធស្នាលជាមួយ Ronaldo ក្នុងពេលលេងនៅក្លិបជាមួយគ្នា។ ចាប់តាំងផ្លាស់មកលេងនៅប្រទេសក្រិក គេលេងបាន១០ប្រកួតហើយ គិតគ្រប់កម្មវិធី៕
សុក្រ , 13 មករា 2023 43 អ្នកទស្សនា 17 ថ្ងៃកន្លងទៅ
ការប្រកួតកីឡាអបអរ ទិវាជ័យជំនះ៧មករា ២០២២ នៅខេត្តកណ្តាល ទទួលបានការគាំទ្រខ្លាំងពីមហាជន
ការប្រកួតកីឡា អបអរទិវាថ្ងៃជ័យជំនះ៧មករា នៅខេត្តកណ្តាលទទួលបានការគាំទ្រខ្លាំងពីមហាជន ដែលបានចូលរួម ក្រោយដំណើរការប្រកួតពីថ្ងៃទី៥ និងបានធ្វើពិធីបិទនាល្ងាចថ្ងៃទី៩ ខែមករា ឆ្នាំ២០២៣ នៅទីលានបាល់ទាត់ក្រុងតាខ្មៅ ខេត្តកណ្តាល ។
បើតាមរបាយការណ៍របស់គណៈកម្មាធិការរៀបចំការប្រកួត បានឲ្យដឹងថា មន្ទីរអប់រំយុវជន និងកីឡាខេត្ត បានរៀបចំការប្រកួតកីឡាប៉េតង់ និងកីឡាបាល់ទាត់ អបអរសាទរខួបអនុស្សាវរីយ៍លើកទី៤៤ ទិវាជ័យជម្នះ ៧មករា ឆ្នាំ១៩៧៩ - ២០២៣ ដែលមានក្រុមបានដាក់ពាក្យចូលរួមប្រកួតរួមមាន៖ កីឡាបាល់ទាត់មានចំនួន១៤ក្រុម ស្មើនឹង២៨០នាក់ កីឡាប៉េតង់ មានចំនួន ២៨ក្រុម ស្មើនឹង១១២នាក់ ស្រី២០នាក់ ។ ក្នុងនោះការប្រកួតកីឡាប៉េតង់ ចែកចេញជាបីវិញ្ញាសារួមមាន៖ វិញ្ញាសាវ័យចាស់ វិញ្ញាសាយុវជន និងវិញ្ញាសានារី ដោយបានធ្វើការប្រកួត១នាក់ទល់១នាក់ និង៣នាក់ទល់៣នាក់ ។
ក្នុងឱកាសនោះលោក ប៊ុន ផេង អភិបាលរងនៃគណៈអភិបាលខេត្តកណ្តាល បានមានប្រសាសន៍ថា ការប្រកួតនេះ រៀបចំឡើងក្នុងគោលបំណង អបអរសាទរថ្ងៃជ័យជម្នះ ដ៏ធំធេងក្នុងប្រវត្តិសាស្ត្រកម្ពុជា ដែលបានរំដោះប្រជាជនកម្ពុជាចេញពីរណ្ដៅឈាម និងទឹកភ្នែក និងដើម្បីបន្តផ្សព្វផ្សាយដល់ យុវជនជំនាន់ក្រោយ ដែលមិនបានឆ្លងកាត់ របបវាលពិឃាតនេះ បានយល់ដឹងកាន់តែច្បាស់ នូវអនុស្សាវរីយ៍ដ៏ជូរចត់ ដែលប្រជាជនកម្ពុជាពិតជាមិនអាចបំភ្លេចបាន នូវស្នាមអតីតកាល ក្រោមរបបប្រល័យពូជសាសន៍របស់ពួក ប៉ុល ពត ដ៏ឃោរឃៅយង់ឃ្នងបំផុត ដែលមិនធ្លាប់មានក្នុងប្រវត្តិសាស្ត្រមនុស្សជាតិ ។
ការប្រកួតនេះ បានឆ្លុះបញ្ចាំងឲ្យឃើញថា មន្ត្រីរាជការគ្រប់លំដាប់ថ្នាក់ពិសេសយុវជន យុវនារីយើង មានឱកាសចូលរួម និងលេងកីឡា ដើម្បីទទួលបាននូវសុខភាព មិត្តភាព និងសាមគ្គីភាព រវាងក្រុមមួយ ទៅក្រុមមួយកាន់តែមានភាពស្និទ្ធស្នាលក្រៃលែង។ លោក ប៊ុន ផេង បន្តថា វិស័យកីឡានៅក្នុងខេត្តកណ្តាល ត្រូវបានយកចិត្តទុកដាក់ ជំរុញឲ្យមានការប្រកួតពីសំណាក់ អាជ្ញាធរគ្រប់លំដាប់ថ្នាក់ សម្រាប់ថ្នាក់ខេត្តយើងបានរៀបចំការប្រកួតកីឡាមហាជន កីឡាសិស្សបឋមសិក្សា មធ្យមសិក្សា យុវជនបាល់ទាត់នារីជ្រើសរើសជើងឯក ជារៀងរាល់ឆ្នាំ ដែលនេះបង្ហាញឲ្យឃើញនូវការគាំទ្រវិស័យកីឡាពីសំណាក់ប្រជាពលរដ្ឋក្នុងខេត្តពិសេសក្រុមយុវជនក្មេងៗ ។ តាមរយៈការប្រកួតនេះ លោកអភិបាលរងខាងលើ យល់ឃើញថាកីឡាករ កីឡាការិនីទាំងអស់បានបង្ហាញនូវបច្ចេកទេសដ៏ប៉ិនប្រសប់របស់ខ្លួន ដើម្បីយកជ័យជម្នះជូនក្រុម ជាពិសេសការចូលរួមប្រកួតនេះបានបង្ហាញស្មារតីគោរពស្រឡាញ់ ថ្ងៃ៧មករា ដែលជាថ្ងៃកំណើតទី២ របស់យើងទាំងអស់គ្នា ដោយតែងតែចូលរួមក្នុងកម្មវិធីប្រកួតអបអរនេះជារៀងរាល់ឆ្នាំ ។
ចំពោះលទ្ធផលផ្នែកប៉េតង់ នារី វិញ្ញាសា១ទល់១នាក់ ចំណាត់ថ្នាក់លេខ១ បានលើ កីឡាការិនី គិន កញ្ញជនា មកពីក្លិប ព្រែកហូរ វិញ្ញាសា៣ទល់៣នាក់ ចំណាត់ថ្នាក់លេខ១ បានលើក្លិប អមរៈ ។ ផ្នែកយុវជន ១ទល់១នាក់ លេខ១ បានលើកីឡាករ សុខ តុលា មកពីក្លិប យុវជនក្រុងតាខ្មៅ១ ៣ទល់៣នាក់ លេខ១បានលើក្លិប យុវជនក្រុងតាខ្មៅ១ ។ ផ្នែកវ័យចាស់ ១ទល់១នាក់ លេខ១ បានលើកីឡាករ យឹម សោភ័ណ ក្លិប ក្រុងតាខ្មៅ ៣ទល់៣នាក់ លេខ១ បានលើក្លិប អាកាសចរណ៍ ។រឺឯប្រភេទកីឡាបាល់ទាត់ ចំណាត់ថ្នាក់លេខ១បានលើក្រុម យុវជនខេត្តកណ្តាល ៕
អង្គារ , 10 មករា 2023 53 អ្នកទស្សនា 20 ថ្ងៃកន្លងទៅ
សហព័ន្ធកីឡាស្គែតកម្ពុជា បញ្ជូនកីឡាករឆ្នើម0២រូប ចូលរួមកម្មវិធី Dream Program 2023 នៅកូរ៉េខាងត្បូង
សហព័ន្ធកីឡាស្គែតកម្ពុជា នៅថ្មីៗនេះ បានបញ្ជូនកីឡាករឆ្នើមរបស់ខ្លួនចំនួន២រូប និងជំនួយការគ្រូបង្វឹកមួយរូបទៅចូលរួមវគ្គបណ្តុះបណ្តាលស្គីក្តារទឹកកក (Snowboard) ក្នុងក្របខណ្ឌកម្មវិធី Dream Program ២០២៣ ដែលត្រូវបានរៀបចំឡើង នៅទីក្រុងព្យុងឆាង (PyeongChang) ក្នុងខេត្តហ្គាងវ៉ុន សាធារណៈរដ្ឋកូរ៉េ (កូរ៉េខាងត្បូង)។ កម្មវិធីមាន ដំណើរការរយៈពេល១២ថ្ងៃ ពោលគឺចាប់ពីថ្ងៃទី០៥ ដល់ទី១៧ ខែមករា ឆ្នាំ២០២៣។
កីឡាករ០២រូប និងជំនួយការគ្រូបង្វឹកម្នាក់ ដែលទទួលបានឱកាសចូលរួមក្នុងកម្មវិធីនេះ មានដូចជា៖
១.កីឡាករ វឌ្ឍនៈ សុខគុណ
២. កីឡាករ ខឹម ច័ន្ទសក្តិ
៣. កញ្ញា សោភ័ណ្ឌ ពេជ្រវិច្ឆិកា ជំនួយការគ្រូបង្វឹក។
សូមជម្រាបជូនថា កម្មវិធី Dream Program ជាគំនិតផ្តួចផ្តើមរបស់មូលនិធិ PyeongChang 2018 Legacy Foundation ក្នុង ការផ្សព្វផ្សាយកីឡារដូវរងារដល់ស្រទាប់យុវជន ដែលមិនមានឱកាសលេងកីឡាប្រភេទនេះ។ ជាពិសេសតាមបណ្តាប្រទេសមិនមានព្រិល ឬទឹកកកធ្លាក់។
កម្មវិធីនេះត្រូវបានបង្កើតឡើងនៅឆ្នាំ២០០៤ ដែលជាផ្នែកមួយនៃការត្រៀមខ្លួនធ្វើជាម្ចាស់ផ្ទះកីឡាអូឡាំពិករដូវរងារ របស់ទីក្រុងព្យុងឆាងឆ្នាំ២០១៨។ រហូតមកដល់បច្ចុប្បន្ននេះ មានយុវជនចំនួន២៣៩៨ មកពី៩៥ប្រទេសបានចូលរួម។
កំឡុងរយៈពេល២សប្តាហ៍ យុវជនអាយុចន្លោះពី១៣ទៅ២៣ឆ្នាំ នឹងទទួលបានការបណ្តុះបណ្តាលផ្នែកកីឡារដូវរងារ មាន ដូចជាស្គីក្តារទឹកកក ស្គីភ្នំ ស្គីទឹកកសិល្បៈ ស្គីទឹកកល្បឿនខ្លី ជាដើម។ គោលដៅចំបងនៃកម្មវិធី គឺផ្តល់វគ្គការបណ្តុះបណ្តាល ការផ្លាស់ ប្តូរបទពិសោធន៍គរុកោសល្យបង្រៀនរវាងគ្រូបង្វឹកប្រទេសចូលរួមនីមួយៗ និងពិសេសជាការគាំទ្រដល់ព្រឹត្តិការណ៍កីឡាយុវជនរដូវរងារ អូឡាំពិក២០២៤ ដែលខេត្តហ្គាងវ៉ុនរបស់សាធារណៈកូរ៉េនឹងធ្វើជាម្ចាស់ផ្ទះ។
នេះក៏ជាលើកទី៨ហើយដែលព្រះរាជាណាចក្រកម្ពុជាបានបញ្ជូនកីឡាករ កីឡាការិនី ជំនួយការគ្រូបង្វឹក និងគ្រូបង្វឹក ចូលរួម តាមរយៈគណៈកម្មាធិការអូឡាំពិកកម្ពុជា។ សម្រាប់ឆ្នាំនេះ មានវត្តមានប្រទេសចំនួន៣២ពីបណ្តាទ្វីបនានាដែលបញ្ជូនអ្នកចូលរួម ចំនួនសរុប១៣០នាក់។
សហព័ន្ធកីឡាស្គែតកម្ពុជាទទួលបានភារកិច្ចក្នុងការរៀបចំបញ្ជីឈ្មោះកីឡាករ និងដោយ បានជ្រើសរើសយក ជាពិសេសវិញ្ញាសាស្គីក្តារទឹកកក ដែលប្រហាក់ប្រហែលទៅនឹងកីឡាស្គីក្តាររបស់សហព័ន្ធ៕
អង្គារ , 10 មករា 2023 111 អ្នកទស្សនា 20 ថ្ងៃកន្លងទៅ
សម្ដេចក្រឡាហោម ស ខេង ៖ គ្រប់កីឡាករ-កីឡាការិនីរបស់ក្រសួងមហាផ្ទៃដាច់ខាតត្រូវតែគ្មានសារធាតុញៀន
ថ្លែងក្នុងឱកាសជួបសំណេះសំណាលជាមួយថ្នាក់ដឹកនាំ ប្រតិភូ គ្រូបង្វឹក កីឡាករ និងកីឡាការិនីនៃអគ្គលេខាធិការដ្ឋានអង្គភាព ក្រុមព្រឹក្សាកីឡាក្រសួងមហាផ្ទៃកាលពីព្រឹកថ្ងៃទី៥ ខែមករា ឆ្នាំ២០២៣ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ត្រីក្រសួងមហាផ្ទៃ និងជាប្រធានក្រុមប្រឹក្សាកីឡាក្រសួងមហាផ្ទៃបានមានប្រសាសន៍ថា គ្រប់កីឡាករ-កីឡាការិនីរបស់ក្រសួងមហាផ្ទៃបើពិនិត្យឃើញថា មានសារធាតុញៀន នឹងបណ្ដេញចេញពីអង្គភាព។
សម្ដេចបានមានប្រសាសន៍យ៉ាងដូច្នេះថា « ខ្ញុំសូមអំពាវនាវកីឡាករ-កីឡាការិនីរបស់យើងជៀសវាងដាច់ខាតពីការព្រឹត្តិនូវអំពើមិនគប្បីផ្សេងៗ ហើយនិងត្រូវជៀសវាងដាច់ខាតនូវការប្រើប្រាស់គ្រឿងញៀន។ ចំណុចនេះខ្ញុំស្នើថា ប្រសិនជាមិនទាន់មានវិធានការជាក់លាក់ទេ ក្នុងរយៈពេលកន្លងទៅនេះ ចាប់ពីនេះទៅ សូមឯកឧត្ដម ស សិទ្ធិ អនុរដ្ឋលេខាធិការទទួលជួយការងារដឹកនាំអគ្គលេខាធិការដ្ឋានក្រុមប្រឹក្សាកីឡាក្រសួងមហាផ្ទៃ ចាត់ទុកការធ្វើតេស្តនេះជាការចាំបាច់ យើងមិនបាច់និយាយដល់ថា ជាកាតព្វកិច្ចទេ ប៉ុន្តែចង់និយាយថា គឺជាការចាំបាច់មិនអាចខានបាន»។
សម្ដេចបានសង្កត់ធ្ងន់ថា « បើកាលណាខកខានមិនបានធ្វើតេស្ត សារធាតុញៀនគឺយើងមិនអនុញ្ញាតឲ្យចូលរួមប្រកួតទេ។ ចឹងមុនចូលរួមប្រកួតប្រជែង ចាំបាច់ត្រូវតែមានការបញ្ជាក់អំពីការធ្វើតេស្តសារធាតុញៀនជាមុនសិន។ បើអវិជ្ជមានយើងអនុញ្ញាតឲ្យប្រកួត ឲ្យចូលហាត់ តែបើវិជ្ជមានយើងមិនអនុញ្ញាតឲ្យប្រកួត មិនមែនត្រឹមមិនអនុញ្ញាតប៉ិនហ្នឹងទេ ក៏មិនអនុញ្ញាតឲ្យនៅក្នុងកីឡាករក្រសួងមហាផ្ទៃដែរ»។
ជាមួយគ្នានោះលោក ស សិទ្ធ ក៏បានមានប្រសាសន៍ដែរថា ក្រុមប្រឹក្សាកីឡាក្រសួងមហាផ្ទៃ ពិតជាមានកិត្តិយសដ៏ធំធេង ដែលសម្ដេចក្រឡាហោម ឧបនាយករដ្ឋមន្ដ្រី រដ្ឋមន្ត្រីក្រសួងមហាផ្ទៃ និងជាប្រធានក្រុមប្រឹក្សាកីឡាក្រសួងមហាផ្ទៃបានអញ្ជើញជាអធិបតីភាពដ៏ខ្ពង់ខ្ពស់ ក្នុងពិធីសំណេះសំណាលជាមួយថ្នាក់ដឹកនាំប្រតិភូ ប្រតិភូរង គ្រូបង្វឹក និងកីឡាករ-កីឡាការិនីនៃអគ្គលេខាធិការដ្ឋាន នាឱកាសដ៏វិសេសវិសាលនេះ៕
ព្រហស្បតិ៍ , 05 មករា 2023 71 អ្នកទស្សនា 25 ថ្ងៃកន្លងទៅ
ពានរង្វាន់គរុគុណ រៀបចំឡើងដើម្បីរំលឹកគុណ ស្ថាបនិករបស់សហព័ន្ធ ដែលបានលះបង់កសាង ឱ្យមានវឌ្ឍនភាព និងជោគជ័យរហូតដល់បច្ចុប្បន្ន
ការរៀបចំការប្រកួតពានរង្វាន់គរុគុណជារៀងរាល់ឆ្នាំ គឺដើម្បីរំលឹកគុណ ស្ថាបនិករបស់សហព័ន្ធ ដែលបានលះបង់កសាង ឱ្យមានវឌ្ឍនភាព និងជោគជ័យរហូតដល់បច្ចុប្បន្ន ។ នេះបើតាមប្រសាសន៍របស់ឯកឧត្តមសុខ សូកាន ប្រធានសហព័ន្ធកីឡាប៊ូល និងប៉េតង់កម្ពុជាថ្លែងក្នុងពិធីបើកការប្រកួត កីឡាប៊ូល និងប៉េតង់ពានរង្វាន់គរុគុណ លើកទី២ ឆ្នាំ២០២២ និងខួបអនុស្សាវរីយ៍៣០ឆ្នាំ នៃការបង្កើតសហព័ន្ធកីឡាប៊ូល និងប៉េតង់កម្ពុជា ១៩៩២ – ២០២២” នៅថ្ងៃទី២៣ ខែធ្នូ ឆ្នាំ២០២២ នៅពហុកីឡដ្ឋានអូឡាំពិក ។
ឯកឧត្តម សុខ សូកាន បានថ្លែងថា ការរៀបចំអោយមានការប្រកួតជារៀងរាល់ឆ្នាំនេះ ពិតជាបានបញ្ជាក់នូវភាពរឹងមាំនិងភាពចាស់ទុំរបស់សហព័ន្ធ ក៏ដូចជាវឌ្ឍនភាពជាវិជ្ជមានលើវិស័យកីឡាប៊ូល និងប៉េតង់របស់កម្ពុជា។ឯកឧត្តម បន្តថា ប្រភេទកីឡាប៊ូល និងប៉េតង់ ត្រូវបានគេស្គាល់ និងឱ្យតម្លៃ ល្បីល្បាញទូទាំងតំបន់ និងសកលលោក ជាពិសេសត្រូវបានស្ថាប័នសហព័ន្ធកីឡាប៊ូល និងប៉េតង់អន្តរជាតិ (FIPJP) ប្រសិទ្ធនាមកម្ពុជាថាជា “ប្រទេសមហាអំណាចលើវិស័យកីឡាប៉េតង់”។
ឯកឧត្តម សុខ សូកាន បន្ថែមថា ពានរង្វាន់គរុគុណ រៀបចំឡើងដើម្បីរំលឹក និងតបស្នងនូវគុណូបការៈដ៏ឧត្តុង្គឧត្តមរបស់សម្ដេចទាំងទ្វេដែលជាស្ថាបនិករបស់សហព័ន្ធ ក៏ដូចជាឥស្សរជននិងអតីតថ្នាក់ដឹកនាំគ្រប់ជាន់ថ្នាក់របស់សហព័ន្ធ ដែលបានលះបង់កម្លាំងកាយចិត្ត ធនធាន និងខិតខំប្រឹងប្រែងក្នុងការកសាង ឱ្យមានវឌ្ឍនភាព និងជោគជ័យរហូតដល់បច្ចុប្បន្ន។ ជាពិសេសគឺ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដែលជាអតីតប្រធានកិត្តិយសផង និងជាប្រធានសហព័ន្ធផង ព្រមទាំង សម្ដេចវិបុលបញ្ញា សុខ អាន ដែលជាអតីតប្រធានសហព័ន្ធ ក៏ដូចជាឥស្សរជនកំពូលៗជាច្រើនរូបទៀត។តាមរបាយការណ៍ ឯកឧត្តម សុខ សប្បាយណា អគ្គលេខាធិការសហព័ន្ធកីឡាប៉េតង់កម្ពុជា ការប្រកួតកីឡាប៊ូល និងប៉េតង់ពានរង្វាន់គរុគុណ លើកទី២នេះ មានប្រតិភូ និងកីឡាករ កីឡាការិនីចូលរួមសរុប ៤៥៩នាក់ មកពីសមាគម និងក្លឹប៦២ ស្មើនឹង១១រាជធានី-ខេត្ត ប្រកួតលើ៧វិញ្ញាសា សរុប៤៣៨ប្រកួត៕
សៅរ៍ , 24 ធ្នូ 2022 75 អ្នកទស្សនា 1 ខែកន្លងទៅ
